Витебский курьер 30(42)2010

Сапраўдным фурорам і адметнай падзеяй для мастацкага жыцця горада стала адкрыццё ў Цэнтры рамёстваў і мастацтваў “Задзвінне” (прабачце, не магу звыкнуцца з глупствам перайменавання!) выставы шырокавядомай віцебскай мастачкі Валянціны Ляховіч. Не выпадкова вернісаж сабраў велізарную колькасць таленавітых віцебскіх мастакоў – прыхільнікаў самых розных творчых накірункаў. У аснове экспазіцыі – творы, прадстаўленыя ўсяго некалькі месяцаў таму ў Мінску ў Палацы мастацтваў у межах выдатнага праекта “Фактура”. Без усялякага перабольшвання можна сцвярджаць, што Валянціна Ляховіч сёння ў пераважнай большасці сваіх акварэляў проста выдатна “трымае” планку сучаснага еўрапейскага мастацтва. Яе творы – гэта выдатны сплаў неардынарнага творчага мыслення, культуры колеру, добрага густу і адметнай манеры выканання. У складаных абстрактных кампазіцыях прыемна ўражвае наяўнасць асацыятыўнага падтэксту, канцэптуальнай пабудовы мастацкага вобраза. Цалкам натуральна выглядае і адмаўленне пры арганізацыі экспазіцыі ад традыцыйнага афармлення – рам і шкла, выбар даволі дэмакратычных планшэтных модуляў, на якіх і прадстаўлены акварэлі.

• Месца выхаду: Смоленск
• Дата выхаду: 2010-09-02
• Рэдактар: Борщевский О. В.
• Выдавец: Издательский дом Зубр
• Copyright: © 2010 by Издательский дом Зубр
• Кнігазбор: Kamunikat.org
• Дадатковая даведка: Крыніца: http://vitebsk-kurier.info