Віктар Бабарыка сустрэўся з гарадзенцамі

2020-06-08 14:00

:/:

На сустрэчу з патэнцыйным кандыдатам ў прэзідэнты Віктарам Бабарыкам у Гародні, якая адбылася ў памяшканні рынку “Карона”, прыйшло амаль тры сотні гарадзенцаў.

Сустрэча была вельмі добра арганізаваная. Кожны прыйшоўшы, калі быў без маскі на твары, – атрымліваў яе задарма, а сам кандыдат выступаў на адлегласці ад прысутных у мікрафон.

Віктар Бабарыка закрануў на сустрэчы вялікую колькасць пытанняў. На яго думку, у сёлетніх выбарах вельмі важная самаарганізацыя:

– Зараз вельмі вялікі ўздым грамадзянскай супольнасці. Мы яго бачым рэальна. Вельмі шмат ініцыятыў па самастойным уваходжанні людзей у выбарчыі камісіі, у назіральнікі. І мы гэтую ініцыятыву падтрымліваем. У нас на наступным тыдні пра яе будзе заяўлена афіцыйна. Гэта не наша будзе гісторыя, гэта менавіта самаарганізаваная гісторыя па прынцыпе Covid-19.

Віктар Бабарыка падкрэсліў, што трэба мяняць стаўленне да сябраў выбарчых камісій:

– Мы хочам змяніць стаўленне да сябраў гэтых камісій. Чамусьці да іх заўсёды нейкі негатыў, што яны ўдзельнікі фальсіфікацыі і падману. Мы хочам, каб усе зразумелі, што яны – героі. Бо ад іх залежыць наша будучыня і будучыня іхных дзяцей.

Размова з Віктарам Бабарыкам цягнулася болей за 2 гадзіны, і палітык паабяцаў прыехаць у Гародню пасля рэгістрацыі кандыдатам ў прэзідэнты.

Беларускае Радыё Рацыя, Гародня
Фота Сяргея Апановіча

Крыніца: Беларускае Радыё Рацыя

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк