У Берасці прайшла чарговая масавая акцыя супраць завода АКБ

Каля 250 чалавек выйшлі 3-га траўня на вуліцы Берасця, каб выказаць сваю нязгоду з будаўніцтвам акумулятарнага завода.

Па-ранейшаму яны выступаюць супраць шкоднай вытворчасці, супраць затрымання актывістаў і за змену ўлады, распавёў адзін з лідараў Уладзімір Мароз:

– Тэндэнцыя ўжо замацавалася – 250 ужо напэўна трэцюю ці чацвёртую нядзелю трымаецца. Гэтаму паспрыяла затрыманне нашых хлопцаў – гэта Бекалюк, Кабанаў і Андрасюк.

Як адзначыў Мароз, паводле папярэдняй інфармацыі, акцыя таксама адбылася ў Пінску. Адзін чалавек быў затрыманы ў Берасці і два ў Пінску. Дадзеныя асобаў пакуль удакладняюцца. Берасцейца завуць Андрэй, ён трымаў у руках сцяг, адзначыў праваабаронца Раман Кісляк:

– Затрымалі таму, што ён ішоў на чале калоны і нёс сцяг. Я думаю, што з-за гэтага. За ім ішлі супрацоўнікі міліцыі, было бачна, што яго плануюць затрымаць.

Раман Кісляк звярнуў увагу на тое, што пакуль рана казаць, ці адбудуцца судовыя пасяджэнні і па якім менавіта артыкуле яны былі затрыманыя. Цягам дня інфармацыя можа з’явіцца.

Беларускае Радыё Рацыя, Берасце