У Беластоку выйшла навінка, прысвечаная Алесю Бяляцкаму

2024-12-09 20:35

У Беластоку выйшла з друку новая кніга, прысвечаная Нобелеўскаму лаўрэату прэміі міру Алесю Бяляцкаму, з назвай “За беларускае жыццё…”. Выданне прымеркаванае да 10 снежня – Дня сусветнай дэкларацыі правоў чалавека і другой гадавіны надання Нобелеўскай прэміі праваабаронцу і пісьменніку.

Як паведамляе “Рацыя”, змест кнігі складаюць размовы Міхася Андрасюка з Алесем Бяляцкім з цыклу “Вочы ў вочы”, якія гучалі на беларускім Радыё Рацыя, успаміны Алеся Бяляцкага пра музей Максіма Багдановіча, якія таксама друкаваліся на сайце Racyja.com, інтэрв’ю Алеся Бяляцкага, якія гучалі ў эфіры радыё, Нобелеўская прамова, якую зачытвала жонка лаўрэата Наталля Пінчук, апошняе слова Бяляцкага на палітычным карным працэсе і ягоныя лісты з савецкага войска, якія друкуюцца ўпершыню.

Выданне багата аформленае рэдкімі фотаздымкамі розных гадоў, некаторыя з якіх таксама публікуюцца ўпершыню.

Выданне кнігі стала магчымым дзякуючы супольнай працы трох беластоцкіх структураў: Беларускага Радыё Рацыя, тыднёвіка беларусаў у Польшчы “Ніва” і Цэнтра Грамадзянскай Адукацыі Польшча-Беларусь.

Таксама ў межах выдавецкай серыі “Кнігі бяз літар” каманда Kamunikat.org выдала аўдыяверсію кнігі “Халоднае крыло Радзімы” Алеся Бяляцкага.

Эсэ, інтэрв’ю, занатоўкі, створаныя ў тым ліку і падчас свайго папярэдняга зняволення ў бабруйскай калоніі. Галоўная тэма кнігі — успаміны аўтара пра дзяцінства, горад юнацтва Светлагорск, вучобу ў Гомельскім універсітэце, пра канспіратыўную дзейнасць у 80-я гады, першых сяброў і аднадумцаў.

Агучыў Зміцер Бартосік, а паслухаць бясплатна можна на Аudiobooksby.com на “Камунікаце”.

Крыніца: Міжнародны саюз беларускіх пісьменнікаў

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк