Судзяць Бабарыку і фігурантаў справы «Белгазпрамбанку». Незалежныя СМІ не пусьцілі

2021-02-17 11:49

17 лютага Вярхоўны суд Беларусі разглядае справу Віктара Бабарыкі і іншых мэнэджараў «Белгазпрамбанку». Працэс ідзе ў будынку суду Маскоўскага раёну Менску.

Віктара Бабарыку і шэсьць былых топ-мэнэджэраў банку абвінавацілі ў атрыманьні хабару ў асабліва буйным памеры арганізаванай групай. Бабарыку дадаткова выставілі абвінавачаньне і ў легалізацыі даходаў. За даваньне хабару судзяць былога кіраўніка лізінгавай кампаніі Віктара Кабяка.

11.10

Людзі патрабуюць пусьціць іх на фармальна адкрыты судовы працэс. Каля сотні людзей ня трапілі ў судовую залю.

11.05
Пачаўся суд, паведамляе дзяржаўнае агентцва БелТА. Незалежныя СМІ на працэс не пусьцілі.

10.57
Ня ўсе сваякі падсудных трапілі ў залю.

10.45
З тэлефонам і пляншэтам ў залю не пускаюць. Тэхніку трэба здаць на ўваходзе, паведамляе ТГ-канал Віктара Бабарыкі.

10.30

Людзі ў чарзе ў суд. Каля ўваходу ў суд сабралася каля сотні чалавек. Яны крычаць: «Запускай!» і просяць, каб ім дазволілі прысутнічаць на адкрытым працэсе.

10:05
Віктара Бабарыку прывезьлі ў суд

Фігуранты справы Бабарыкі

    Віктар Бабарыка (ч.2 арт. 235, ч.3 арт. 430 КК),
    Кірыл Бадзей (ч. 3 арт. 430 КК),
    Сяргей Дабралёт (ч. 3 арт. 430 КК),
    Аляксей Задойка (ч. 3 арт. 430 КК),
    Алксандар Ільясюк (ч. 3 арт. 430 КК),
    Віктар Кабяк (ч. 2 арт. 431 КК),
    Дьмітры Кузьміч (ч. 3 арт. 430 КК),
    Сяргей Шабан (ч. 3 арт. 430 КК).

Віктар Бабарыка і Аляксей Задойка адмовіліся падпісаць угоду са сьледзтвам, астатнія падпісалі.

Як гаворыцца ў матэрыялах сьледзтва, усе абвінавачаныя, акрамя Віктара Бабарыкі, прызналі віну цалкам.

«Белгазпрамбанкам» кантралёры зацікавіліся адразу пасьля таго, як Віктар Бабарыка пакінуў пасаду старшыні праўленьня і агучыў намер балятавацца ў прэзыдэнты. 18 чэрвеня 2020 году Бабарыку затрымалі. Нягледзячы на больш як 400 тысяч сабраных подпісаў за вылучэньне Бабарыкі, ЦВК не зарэгістравала яго кандыдатам у прэзыдэнты.

Крыніца: Радыё Свабода

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк