Полацкія сустрэчы над Дзвіной у Познані

2025-04-02 17:08

У Познані адбылася сустрэча з беларускім пісьменнікам і гісторыкам Уладзімірам Арловым, які зладзіў экскурс у гісторыю да чарговай гадавіны Беларускай Народнай Рэспублікі - «Ад Рагвалода да БНР».

"Гэтая сустрэча ў Познані, дарэчы, за апошнія гады ўжо трэцяя, запомніцца тым, што на ёй былі мае землякі-палачане, - падкрэсліў Уладзімір Арлоў. - Мы згадвалі родныя вуліцы, Дзвіну і Палату… Адна палачанка не стрымала слёз. А яшчэ мне давялося падпісваць добра-такі зачытаную кнігу “Танцы над горадам”. Усцешыўся, што цэлая кампанія чытачоў паспела ўжо патанчыць над Дзвіной з маімі героямі-самнамбуламі…"

Беларусы Познані цікавіліся таксама іншымі кнігамі Уладзіміра Арлова.

Распавядаючы пра 25 гадоў Беларускай інтэрнэт-бібліятэкі Kamunikat.org, яе стваральнік Яраслаў Іванюк паведаміў, што "добрыя людзі" распачалі ўжо працу над прыладай для праслухоўвання камунікатаўскіх аўдыёкніг для сістэмы Анройд:

- Мы запісалі ўжо больш за 60 сучасных беларускіх аўдыёкніг. Гэта 500 гадзін, якія можна безкаштоўна спампаваць з сайту Kamunikat.org, праслухаць на нашым YouTube-канале і на шэрагу іншых платформаў, а таксама ў прыладзе для iPhona. А праз нейкі час з'явіцца магчымасць слухаць нашыя аўдыёкнігі на смартфонах з Андроід".

Сустрэча з беларусамі Познані была перадапошняй у літаратурна-гістарычным туры Фонду Kamunikat.org і Уладзіміра Арлова.

2 красавіка запланаваная яшчэ адна сустрэча ў Цэнтры беларускай салідарнасці ў Варшаве.

Крыніца: Kamunikat.org

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк