«Нясвіжская крыза альбо вернуты рай» — успамін пра Уладзіслава Ахроменку

Кніга «Нясвіжская крыза альбо вернуты рай» гэта зборнік прозы заўчасна пакінуўшага гэты свет таленавітага пісьменніка Уладзіслава Ахроменкі, якую выдаў Фонд Kamunikat.org

Кніга вельмі розных жанраў і накірункаў. Чытач знойдзе тут яго славутую «Тэорыю змовы» — вострасюжэтны кінараман-фарс, у якім Аўтар ставіць у парадаксальнай і жорсткай форме тыя беларускія пытанні, якія многія баяцца задаць сабе нават у думках. Ёсць таксама «Музы і свінні» — кніга гарадскіх міфаў, легендаў і апокрыфаў пра герояў, якія нас змянілі. Сярод герояў Дзед Талаш, Дзмітрый Шастаковіч, Кім Ір Сэн, Уладзімір Мулявін, Жак-Іў Кусто, але ёсць таксама ананімныя акцёры, рэжысёры, музыкі, мастакі, мянты, цэнзары і камітэтчыкі.

У зборнік прозы мы вырашылі дадаць нідзе дагэтуль не публікаваныя тэксты двух незавершаных раманаў: «Нясвіжская крыза» i «Выкрадальнік гукаў». «Ведаючы творчыя модулі Уладзіслава, — піша яго сябра і суаўтар некалькіх кніг Максім Клімковіч, — магу сцвярджаць, што першы тэкст — гэта недзе 70% ад меркаванага канчатковага аб’ёму, а другі — ўсяго каля 10%».

У прэзентацыі прыме ўдзел пісьменнік, літаратурны крытык і сябра аўтара Алесь Аркуш да ўдава па Уладзіславе Ахроменку — Вольга.

Запрашаем на прэзентацыю!