Новы Час 49 (708) 2020

Ёсць такое выслоўе-праклён, які зазвычай прыпісваюць кітайцам: «Каб ты жыў у цікавыя часы!» Насамрэч, гэты «праклён» выдумаў брытанскі дыпламат Х’ю Нэтчбул-Х’юджэс, які быў паслом Вялікабрытаніі ў Кітаі з 1936 па 1937 гады. Тым не менш, мы сапраўды жывём у цікавы час, у час пераменаў. Наступны, 2021-ы, нягледзячы на тое, што па кітайскім календары гэта год Быка, які перамены не вельмі любіць, для нас будзе такім жа годам перамен, як і 2020-ты. Што б хацелася нам усім пажадаць? Найперш, трываласці і ўпартасці. Каб мы паспяхова скончылі тое, што пачалі ў 2020-м годзе. Яшчэ перад выбарамі мы казалі: перамены не будуць лёгкімі, і нам трэба прыкласці вялікія намаганні, каб яны здзейсніліся. Гэтак жа будзе і ў 2021-м. Нам патрэбныя вытрымка і аптымізм — каб не апускаліся рукі, каб мы верылі ў тое, што мы робім. Нам патрэбная моц — бо толькі сыходам гэтай, наскрозь гвалтоўнай улады, справа не скончыцца. Нам трэба будзе ўзнаўляць краіну. Нам патрэбная ўпэўненасць і вера ў сябе: бо ніхто апроч нас — ні Захад, ні Усход — не зробіць нашу краіну такой, якой хочам зрабіць яе мы. І нам патрэбная добрая памяць, каб словы «не забудзем, не даруем» не аказаліся толькі словамі. І нам вельмі спатрэбіцца тая самая абрыдлая беларуская «талерантнасць», бо з нашай краіны нікуды не падзенуцца ні шчырыя «ябацькі», ні былыя чыноўнікі, ні былыя амапаўцы, ні былыя суддзі. Ім, канешне, давядзецца каяцца, але нам з імі прыйдзецца неяк суіснаваць.

• Месца выхаду: Мінск
• Дата выхаду: 2020-12-25
• Рэдактар: Колб Аксана
• Copyright: Прыватнае выдавецкае ўнітарнае прадпрыемства «Час навінаў».
• Кнігазбор: Kamunikat.org