- Kamunikat.org
- Бібліятэка
- Кнігазборы
- Калекцыі
- Іншае
17 верасня 1939 года — дата неадназначная. У польскай гістарыяграфіі лічыцца яна пачаткам савецкай акупацыі, а ў савецкай — вызвалення Заходняй Беларусі і Украіны з-пад польскага панавання. Апошнія гады прынеслі рэзкую пераацэнку фактаў навейшай гісторыі. І хаця гістарычная навука ў Беларусі не вольная яшчэ ад савецкай ідэалагічнай спадчыны, аднак станоўчыя зрухі ў напрамку яе дэідэалагізацыі і аб’ектывізацыі адбываюцца. Можна было ў гэтым пераканацца падчас навуковай канферэнцыі „Грамадска-палітычнае жыццё на Беларусі ў 1939-1941 гадах”, арганізаванай 26-27 лістапада г.г. Беларускім гістарычным таварыствам і Кафедрай беларускай культуры Універсітэта ў Беластоку, у якой удзельнічалі гісторыкі з Польшчы і Беларусі. Змешчаны ў 21 дакладзе фактаграфічны матэрыял і зробленыя на яго падставе высновы кідаюць новае святло на аналізуемы перыяд. Ужо першы даклад, з якім выступіў Рыгор Лазько з Гомеля („Паход Чырвонай Арміі на Захад: погляд з Усходу”), прыцягнуў маю ўвагу адсутнасцю савецкай рыторыкі. Паводле дакладчыка, сустрэча беларусаў з усходу з суайчыннікамі з захаду ў верасні 1939 г. была сустрэчай двух светаў, двух ладаў жыцця, і прынесла расчараванне абодвум бакам. Грамадзяне БССР думалі, што ў Заходняй Беларусі людзі жывуць горш за іх. (Несавецкі погляд на беларускую гісторыю, В. Луба, фрагмэнт)