Навінкі 01 (39)

«Наві́нкі» — беларуская палітыка-сатырычная газэта. Заснаваная напачатку 1998 актывістамі анархічнай групоўкі «Чырвоны Жонд». Стылістыка — жорсткі трэшавы сьцёб з палітычных рэаліяў, кліпавы мантаж, палітычная карыкатура на грані непрыстойнасьці, максымальна ангажаваная падача навінаў, сатырычныя коміксы, палітычныя і культуралягічныя правакацыі. За правобраз газэты была ўзятая газэта «Навіны», назва і лягатып якой былі нязначна зьмененыя такім чынам, што новая назва супала з распаўсюджанай назвай рэспубліканскай клінічнай псыхіятрычнай бальніцы «Навінкі», якая знаходзіцца ў аднайменным пасёлку пад Менскам. Канцэпцыя — сплаў традыцыяў польскай «Nie!», «Памаранчовай альтэрнатывы», францускай Сharlie Ebdau, савецкага «Кракадылу» ў мэтах вынаходніцтва новага беларускага контаркультурнага дыскурсу. Люты 1998 — студзень 1999 — выходзіць штомесяц накладам 299 асобнікаў, на правах самвыдату. Фармат чорна-белы, А4. Зь лютага 1999 афіцыйна зарэгістраваная, пераходзіць на фармат А3, двухкаляровы друк. Зь сярэдзіны 2001 году ў газэце зьяўляецца аналітычная ўкладка, прысьвечаная міжнароднай палітыцы, беларускім сацыяльным праблемам. У траўні 2003 году выхад газэты прыпынены на тры месяцы пасьля двух запар папярэджаньняў міністэрства інфармацыі РБ «за парушэньне маральных нормаў грамадзтва» і «абразу прэзыдэнта». Пасьля заканчэньня тэрміну прыпыненьня выхаду заключыць дамову на выданьне не атрымалася з аніводнай беларускай друкарняй. З канца 2003 году выходзіла нерэгулярна ў фармаце глянцавага каляровага выдання.

• Месца выхаду: Мінск
• Дата выхаду: 2001-01-25
• Кнігазбор: Kamunikat.org