Народная Воля 97-98

У сераду ў цэнтры беларускай сталіцы і ў рэгіёнах адбылася чацвёртая па ліку акцыя пад умоўнай назвай «Рэвалюцыя праз сацыяльныя сеткі» Гэтым разам высокае начальства дало разнарадку навучальным установам накіраваць у цэнтр Мінска па 100 чалавек — прыхільнікаў улады. Усе губляліся ў здагадках, для чаго спатрэбілася прыцягваць да акцыі ўвагу яшчэ большай колькасці людзей. Потым высветлілася, што з 18 да 21 гадзіны на Кастрычніцкай плошчы будзе адбывацца маладзёжная дыскатэка. На практыцы ўсё выглядала трагікамічна. І не толькі таму, што ў 18.00 у Мінску быў моцны лівень з навальніцай. Па перыметры плошчы ўсё тыя ж металічныя агароджы і жывыя шчыты з міліцыянераў. Каля прыступкаў Палаца Рэспублікі невялікі натоўп з дзяржаўнымі сцягамі, з надпісамі “БРСМ” і “Белая Русь”. Нейкая спявачка ўсё спрабавала “завесці” публіку. Калі ж яна ў адчаі пачала крычаць “А ну веселее!!! А ну-ка похлопаем!!!”, пачаўся рогат. Заклік, як назло, прагучаў менавіта ў той момант, калі пачалася акцыя пад умоўнай назвай “Рэвалюцыя праз сацыяльныя сеткі”. Людзі пайшлі калонай у бок вуліцы Янкі Купалы. У натоўп адразу пачалі ўкліньвацца спецназаўцы. Самі таго не жадаючы, яны значна павялічылі сваёй прысутнасцю колькасць удзельнікаў шэсця.

• Месца выхаду: Мінск
• Дата выхаду: 2011-07-02
• Рэдактар: Сярэдзіч Іосіф
• Выдавец: УК Народная Воля
• Copyright: © 2011 by Народная Воля
• Кнігазбор: Kamunikat.org