Лекцыя амерыканскага гісторыка Тымаці Снайдэра пра гісторыю беларускіх земляў з’явілася ў сеціве на беларускай мове

Лекцыю, прачытаную прафесарам Ельскага ўніверсітэта ў чэрвені ў Венскім музеі, агучыў на беларускай мове актор незалежнай тэатральнай групы «Вольныя Купалаўцы» Алег Гарбуз.

Як пераплятаюцца антычны свет, скіфы, вікінгі, балты і славяне ў гісторыі беларускіх земляў? Чаму аўтарытарныя ўлады шукаюць сабе апраўданне ў «замарожаным мінулым»? Як гісторыя звязаная з нацыянальным? Як Беларусь стае скрыжаваннем культур, міфаў і глабальных плыняў? Ці беларусы нашчадкі вікінгаў? На гэтыя ды іншыя пытанні адказваў амерыканскі гісторык і аўтар кнігі падчас выступу ўлетку 2025 года ў Венскім музеі.

Тымаці Снайдэр — адзін з найбольш уплывовых і вядомых сучасных амерыканскіх гісторыкаў, спецыяліст па гісторыі Усходняй Еўропы, нацыяналізму, таталітарызму і Халакосту. Прафесар Ельскага ўніверсітэта (Yale University) і супрацоўнік Інстытута гуманітарных навук у Вене. Яго спецыялізацыя — гісторыя ХХ стагоддзя ў Цэнтральнай і Усходняй Еўропе, асабліва ў дачыненні да палітыкі Расіі, Украіны, Беларусі і Польшчы.

Ён выступае з рэзкай крытыкай расійскага імперыялізму і вайны супраць Украіны. Найбольш значныя працы аўтара: «Крывавыя землі: Еўропа паміж Гітлерам і Сталіным» (Bloodlands: Europe Between Hitler and Stalin, 2010). Гэтая кніга стала сусветным бестселерам, яна даследуе масавыя забойствы, здзейсненыя нацысцкім і савецкім рэжымамі на тэрыторыі сучасных Беларусі, Украіны і Польшчы. Другое вядомае выданне — «Пра тыранію: Дваццаць урокаў дваццатага стагоддзя» (On Tyranny: Twenty Lessons from the Twentieth Century, 2017). Кароткі дапаможнік, які дае парады, як процістаяць усталяванню таталітарызму ў сучасным грамадстве.