Кніга Евы Вежнавец выйшла па-дацку

2025-09-04 16:22

У дацкім выдавецтве Palomar выйшаў пераклад з беларускай мовы кнігі Евы Вежнавец «Hvad søger du, ulv?» («Па што ідзеш, воўча»). Перакладчыкам аповесці выступіў Гаральд Гартвіг Епсэн (Harald Hartvig Jepsen).

Нагадаем, што кніга Евы Вежнавец упершыню выйшла па-беларуску ў выдавецтве «Пфляўмбаўм» у 2020 годзе і зазнала некалькі перавыданняў. У кнізе апавядацца пра Рыну, алкагалічку сярэдніх гадоў, якая з неахвотай едзе на пахаванне сваёй бабкі ў забытую богам беларускую глушэчу. Пакуль памірала ейная старая, Рына займалася чужымі ў дамах шчаслівай старасці на Захадзе. Адзінае, чаго яна хоча цяпер, — спакой. Але дома яе чакае неспадзяванка — старыя грахі і спадчына маюць доўгія цені. Ці можна ўсё выправіць, калі ты і блізка не цягнеш на гераіню? Рыне трэба пахаваць бабку, адкапаць каханка, аднавіць крыніцы, ніколі не прыходзячы ў поўную свядомасць. Жанр гэтай кнігі — балотная казка.

Раней аповесць выходзіла ў перакладах на нямецкую, чэшскую, шведскую, нарвежскую, польскую мовы. «У працэсе падрыхтоўкі і іншыя пераклады», — кажуць у выдавецтве.

Неўзабаве кніга з’явіцца на старонцы выдавецтва Palomar, проста цяпер можна замовіць у некалькіх анлайн-крамах Saxo.com, Bog-ide.dk, Gucca.dk і інш.

Крыніца: Міжнародны саюз беларускіх пісьменнікаў

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк