Імпрэзы Фонда Kamunikat.org на фестывалі Pradmova у Варшаве

2024-11-15 21:05

15—18 лістапада Pradmova збярэ розных аўтараў і аўтарак, мастачак і мастакоў, даследчыкаў і даследчыц і музыкаў на розных пляцоўках. Шэраг цікавых сустрэч прызначае чытачам і аматарам беларускай кнігі Kamunikat.org.

16 лістапада адбудзецца прэзентацыя кнігі Валянціны Аксак "Уцёкі з Палесься". Вершы з гэтага паэтычнага зборніка нарадзілася на пакутных шляхах змушанай блуканкі. Асабісты боль выгнанніцы з роднага дому аўтарка шматкроць узмацняе трагедыяй зняволеных і закатаваных у вязніцах на радзіме. Захопніцкая вайна за яе паўднёвымі межамі не пакідае ні каліва спадзеву на шчаснае вяртанне. І ўсё ж лейтматывам кнігі ёсць загад паэткі самой сабе – жыць навырост!

Час: 15.20-16.00

Месца: пляцоўка В (ul. Foksal, 11)

Трохі пазней на той самай пляцоўцы пройдзе сустрэча з Уладзімірам Арловым "Biełaruskaja łacinka: tradycyja i sučasnaść". Прэзентацыя кніг аўтара “Patria aeterna” i “Śvieciacca vokny dy nikoha za jimi”.

Vydadzienyja łacinkaju knihi Uładzimiera Arłova „Patria aeterna” i „Śvieciacca vokny dy nikoha za jimi” padtrymlivajuć jaje daŭniuju tradycyju ŭ biełaruskaj kultury.

Uładzimier Arłoŭ naradziŭsia ŭ 1953 hodzie ŭ Połacku. Aŭtar tryccaci knihaŭ prozy, esejistyki i paeziji. Uładalnik niekalkich ajčynnych litaraturnych uznaharodaŭ.

Час: 17.30-18.05

Месца: пляцоўка В (ul. Foksal, 11)

17 лістапада Kamunikat.org запрашае на прэзентацыю зборніка паэзіі Анхелы Эспіносы Руіс - “Астралябія Божых таямніц”.

На імпрэзе можна будзе слухаць старыя і новыя творы, задаваць пытанні, шукаць маленькія цуды і праявы любові ў штодзённасці.

Анхела Эспіноса Руіс – беларускамоўная паэтка з Гішпаніі. У яе новай кнізе лірыкі мы сустрэнем замкі Эўропы, неідэальную сымэтрыю каханьня і невычарпальныя пытаньні неба.

Час: 12.30-13.00

Месца: пляцоўка А (ul. Foksal, 11)

Трохі пазней - Сустрэча са Змітром Бартосікам. Вечар падарожжаў.

Зміцер Бартосік раскажа пра самыя цікавыя моманты са сваіх падарожжаў, якія ўвасобіліся ў кніжную трылогію. “Быў у пана верабейка гаварушчы”, “Клініка кітайскана дантыста”, “Забіць Упалмінзага”. Апошнюю кнігу можна будзе набыць у аўтара.

„Забіць упалмінзага“ — трэцяя кніга Зьмітра Бартосіка ў серыі „Падарожжаў Свабоды“ пасля папярэдніх: „Быў у пана верабейка гаварушчы“ і „Клініка кітайскага дантыста“. Тут, як і ў ранейшых кнігах, апавядаецца пра невядомыя факты беларускай гісторыі на падставе дакументаў і галасамі жывых сьведак, якіх на момант выхаду кнігі амаль не засталося. Гаворка ідзе пра апошнюю спробу ўратаваньня рэальнасці, якой яна была ў пасляваеннай Беларусі, — без інтэрпрэтацый.

Час: 16.30-17.10

Месца: пляцоўка В (ul. Foksal, 11)

На кніжным кірмашы падчас фэсту Pradmova можна будзе набыць усе кнігі Фонда Kamunikat.org.

Поўная праграма фэсту ТУТ .

Крыніца: Камунікат

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк