Беларус 573

Новая старонка ў гісторыі “Беларуса”. Шаноўныя чытачы! Пачынаючы ад сьнежня 2010 году газэта “Беларус” будзе выдавацца пад кіраўніцтвам новай рэдакцыі, якую ўзяўся сфармаваць сп. Вячка Станкевіч, і зь якім я ўжо меў перамовы на гэты конт. Адысьці ад выданьня газэты, якой я аддаў апошнія восем з паловаю гадоў свайго жыцьця, прымусілі мяне, у вялікай меры, зьмены ў маім асабістым жыцьці, якія ўсё часьцей і часьцей не дазваляюць знаходзіць дастаткова часу для пасьпяховага выкананьня рэдактарскіх абавязкаў. Але галоўнаю прычынаю такога рашэньня сталі ўмовы грамадзкага жыцьця, якія запанавалі ў нашай дыяспары з прыходам да кіраўніцтва Беларуска Амэрыканскім Задзіночаньнем сп. Вячкі Станкевіча і ягонай “каманды”. Вось ужо чацьвёрты год варажнеча паміж сябрамі, якія раней доўгія гады плённа працавалі на беларускай грамадзкай ніве, толькі расьце і пашыраецца. І сёньня яе ўзровень дасягнуў такіх памераў, што ў нейкае прымірэньне ўжо і ня верыцца. Людзей, якіх я асабіста даўно ведаю, і якія сваёю шматгадоваю ахвярнаю грамадзкаю працаю заслужылі давер і павагу нашага грамадзтва, без усялякіх на тое падставаў пачынаюць выключаць з арганізацыяў і ўстановаў, над якімі ўжо займеў кантроль сп. Станкевіч. Пра іх распаўсюджваюць самыя неверагодныя, цалкам беспадстаўныя і бяздоказныя плёткі, абвінавачваюць у самых цяжкіх грахах. Губляць свае сілы, час і здароўе на змаганьне з гэтаю “прапагандаю” ўжо не стае моцы. Цяпер вось дайшла чарга і да мяне. Абвінавачваньне простае – захапіў газэту.

• Месца выхаду: Нью-Ёрк
• Дата выхаду: 2010-10
• Рэдактар: Клакоцкі Марат
• Выдавец: Беларуска-Амэрыканскае Задзіночаньне
• Copyright: © 2010 by Беларус
• Кнігазбор: Kamunikat.org